Read in English | Download a Recording of the Announcement in Enga
Endakali Mendapu Sangumana Latala Yangao Kumasilyamino Doko Kaena Lao Lelyamano
Indupa mana eteteaka eteteaka koo mende Enga potopinja dakenya ipatelyamo. Endakali mendapu sangumana latala, mee tenge setapala yangao kumasilyamino mana dokonya lao lelyamano. Wamba naimanya yumbange dupame mana koo doko naminiami-pyaa. Dopaka doko, indupa Enga endakali mendapuame mana koo doko minilyamino. Tenge dokonya, naima Enga Kristene siosa katenge dutupa pitakanya mendai-mendai lao pitipala, Baibolo kandao Enga piimi kapilyingi akali dutupame pii dake lelyamano.
Endakali mende kumatamopapi, yaina setamopapi, endakali mendapuame dapa lengema: Endakali mendeme endakali dokonya mona doko yukuo nalame-lamona lengema. Dokopa, apimi mona doko yukuo nalape lao glasman mende tipa pingima. Tipa pilyaminopa, glasman dokome angi kiningi laa naeyao, nemongo manemane pingi dokomena, endakali dupa minakasoo, baame endakali mende-kisa mee tenge setenge. Dopa pilyamopa, endakali dupame glasman dokonya pii doko sepala, endapi akalipi mende kenge lelya doko lanyepala, mona doko yukuo nyepala anja setalepe lao, paa longosa paka pisoo tipa pingima. Tipa pilyaminopa, endakali tenge setalyami dokome baa nakanjona lelyamo dokopa, baa paka pisoo, angi mona yukuo nalo laa latala baa tanda maiyoo yangengema. Dokopa baa tanda dyoo kumasalamini-lamo lao kandatala, baame tanda nandina latala, mee nalona lenge. Nalona latelyamopa, dupame deaka pyapa pyoo, "Embame iki nalepe? Mende maiyoo nalepe?" lao deaka tipa pyoo, tanda maiyoo yangao kumasingima. Dee mana koo longo mendapu minao, endakali mee tenge setapala, minao koeyasoo kumasingimaka.
Endakali mee tenge setalyami dupa-kisa mana koo mende nasingi. Glasmanepi, endakali glasmanenya pii sepala wata-miningima dupame, Satanenya kalai doko pilyamino dupa-kisa tenge singi. Endakali mendapu kandao sangumana latala pyao kumasilyami dokome, Satanenya kalai doko etasilyamano lengema. Dopaka doko, Satanenya kalai doko etasala naengema. Satenenanya kalai doko eteteaka minao andasingima. Dopa pilyami dokome, Satane kenge andake nyepala, kalai doko eteteaka minao andasimupa, naima endakali dupa dokonya konda pilyamano.
Glasman dupame angi nakandao, masala naeyaowaka, mee muni nyemana latala, endakali dupa minakasoo sambo lengema. Glasman dupanya pii dupa nasepenge. Dee glasman kenge doko kaeyapala, muni nyalanya sambo lenge akali lamana.
Naimame nyakama kiningi langilyamanona salapape! Endakalimi endakali yangonya mona yukuo nanenge. Endakali dupame angi mende nakandao, endakali mende kandao mee sangumana lengema. Dopa lengema dokonya, endakali waka dupame endakali doko kandao, baa sanguma-lumu lao masingima. Mana doko eteteaka koo mende. Endakali mendeme endakali mende kandao sangumana latamo doko, baanya pii doko kiningina lao masala naeyalapape. Embame endakali mende kandao baa sangumana lateno doko, embame baa pyao kumasetenosa pita. Dee maitakao emba kandao endakali mendeme sangumana latakana, endakali mende kandao embame sangumana nalapeaka. Dee endakali mende embame sangumana lao tenge setatenopa, pyao kumasetamino doko, embame koo pyoo Papua New Guineanya loo, endakali pyoo kumasala naeyape latae singi doko yalate. Dee maitakao Goteme endakali dupa mokosetamo gii dokopa, tenge doko emba-kisa ipatana, kandao katape.
Yuu Napotesa dokonya, wanaku kole ee kana tepoma latae mende mandipaeme nyingi-pyaa. Endangimi wanaku doko lanyoo yaina andaka paa longosa pao ipao pingi-pyaa. Dopa pilyamopa, baanya sekele buku dokonya nesa dupame yaina mandipaeme nyingina lao paa longosa pyanya setakamaingima-pyaa.
Gii mendepa, wanaku mandipaeme nyingi doko mandipaeme nyiamopa baa kumapae joo sia-pyaa. Dokopa, endakali dosa kateami dupame sae ita mende pokao sangalinya seteami-pyaa. Dopa piaminopa, wanaku doko dopa petae mee siamosa, mena mende pyao sangalinya setakamaina leami-pyaa. Dopa leaminopa, wanaku mandipaeme nyingi dokonya endanginya takange dokonya mena yakane mende andaka katao pilyamona, doko pyamana andaka mua latala peami-pyaa. Mena doko pyao yaowatae peteaminopa, endakali mendeme lao pituu, "Glasman mende amasa pilyamo lelyaminona" lea-pyaa. Dopa leamopa, endakali peteamino dupame glasman doko lanyala pena leami-pyaa. Dokopa glasman doko ipupala, endakali peteamino dupa lamaiyoo, "Wanaku dake endakali lenge mendeme kanjome-lamona" lea-pyaa. Dopa lateamopa, endakali peteamino dupame lao pituu, "Endakali api katalape?" lao nyakama-lapo leami-pyaa. Dokopa, mendapuame enda mende kenge leami-pyaa. Dokopa, enda kenge leami dokome wanaku kole dokonya mona yukuo nalame-lamona" lao, glasman dokome lea-pyaa. Dopa leamo tenge dokome, enda kenge leamino doko baanya andaka palipiamopa, andatombe dokonya pyale tao lanyepala, "Wanaku kole dokonya mona doko andusa yukuo setakamaiyepe?" lao tipa piami-pyaa. Dee "Embame endakali mende tole apata katalambipi" lao tipa piamiaka-pyaa. Dokopa enda dokome enda mende kenge latala, dokome bata yuungi salimi lekena latala, mendai baa nena lalona lea-pyaa. Dopa leamosa, enda mende doko maiyoo tole nalambini-lumu latala, baa yangao kumasiami-pyaa. Dopa petala, yongama enda mende doko lanyepala kingi nyoo maitakaita yaki petala, yangao kumasalanya piaminopa, enda dokome Jisasa lao loma siamopa, kingi maitakaita yaki piaminoli petae doko baa tangeme ipao enombatena katea-pyaa. Dokopa enda dokome nengeme kende dupa nao pindapala, paka pyakao pea-pyaa. Indupa enda doko yangao koeyasetae kombe paleta pilyamo. Glasman dokome sambo leamopa, enda dolaponya mende doko pyao kumasiami, mende doko yangao koeyesetae kombe paleta pilyamo. Glasman dokome sambo leamopa, enda mende doko kumao, mende doko yangao koeyasoo piami dokonya, yanda singimi glasman doko anjingi andaka anjoo pyandeami. Enda dolapo yangeamino akali dupame sambo piinya mee yangeama-lamo lao kandatala, nyakama paka kaeyapala yalo pyoo paelyamino.
Wanaku kole mandipaeme nyingi-lumu doko mandipaeme nyingi gii doko epeamopa, mandipaeme nyia-pyaa. Indupa mandipaeme nyingi wanaku doko saka pilyamo. Dopana, endakali mende kumatamopapi, yaina setamopapi, glasman mende kanja napupape. Glasman dupame muni nyalanya sambo iki lengema. Dupame lelyami mendenya dii manja naenge.
Yuu Napotesa dokonya iki napiami. Yuu waka Enga dakenya enda longo mendapu sangumana latala yangao kumasilyamino. Dee akali mendapu sangumana latala, pyao kumasiamiaka.
Baibolo dokome lao pituu, Satane doko sambo pii dupanya takangena lapae silyamo. Papua New Guinea yuu dakenya sanguma pii longo mendapu lao taelyamino. Dopaka pyoo, Enga yuu dakenya Sataneme minongapumupa, endakali mende kandao sangumana lengema pii doko taelyamo.
Endakali mendeme emba kandao sangumana latala kisa setatamopa, embame doko sambo lelyamona lao masalapeno. Dopana, endakali mendeme endakali mende kandao sangumana lao kisa setatamo dokopa, embame doko kiningina lao masala naenya, sambo kisaka setao lelyamona lao kandatala, nisoo pii lape.
Endakali mendeme endakali mende kandao baa sangumana latala, mona yukuo nalame-lamo latamo dokopa, embame baa lamaiyoo, "Embame mona doko yukuo nyipumupa angi lengeme kanjepe? Pande nyepala napumupa angi kanjepe?" lao tipa pipi. Dokopa baame yanu pyao, "Nambame nakanjo, mendeme lamona" lengema. Dopa latamopa, mende doko apipi lao tipa pipi. Dokopa baame kenge latamo endakali doko pao tipaka pipi. Tipa pitinopa, baame nakanjo, mendeme lamoakana lenge. Endakali mendaipi mendeme angi lengeme kanjona laa naengema. Dopana, endakali kandao sangumana lengema pii doko, nyakamame kiningina lao masala naeyalapape.
Endakali mende ganame pyatamino doko, kombe palitamopa kandapenge. Endakali mende konja-wuame pokatamino doko, kombe palitamopa kandapengeaka. Endakali dupame kombe kandatala, ganame-lamo laowapi, konja-waume-lamo laowapi lengema. Dopaka pyoo, endakali mendeme endakali mendenya mona yukuo nyipyali doko, mona yukunyiti kombe doko panao palipyali. Dopana, endakali mende kandao sangumana latala, baame endakali mendenya mona doko yukuo nalame-lamo latamino endakali dokonya mona yukunyiti kombe doko palelyape lao kanjepape. Kombe mende napalitamo kandatala, sambo pii-lamo lao masepenge. Dee nemongo mendemepi, spirit mendemepi kapa pao endakali mendenya mona yukuo nyala naenge. Dee mona yukuo nyepala kapa pao palyakamaiya naengeaka.
Endakali mende kumilyamopapi, yaina silyamopapi, endakali mendapuame mee pii mendapu wasoo kiningi joo dapa lengema: "Nambame yaka mende yangatoo lao kopyoo pupupa, endakali mendeme lengeme kanjomo. Yaka doko napala palimanopa, nambanya wane doko mee kumalamo. Dokonya endakali yaka minao ipupupa kanjomo dokome, nambanya wane doko mona yukuo nalame-lamo latala, baa-kisa setelyona" lengema. Pii dopale dupa kiningipi lao kanjanya moko minamali doko angi mende kandao nanyemali. Endakalimi pii dopale dupa lataminopa sepala, kiningi-lumuna lao masala naeyapenge.
Endakali mendeme mona yukuo nalepe lao tipa pitaminopa, nalo latamo kandao doko, itame yangelyamino dokonya paka kaeyapala, mee nalo lenge doko, nyakamame kiningina lao masala naeyalapape. Nyakamanya mende sangumana latala, yangao tanda ditaminopa, embame tanda nanatoo latala, naloaka laapeno doko, embame masepe. Doko kiningi napala laapenope, pande tanda natone latala, sambo laapepe? Daa, tanda natone latala, sambo laapeno. Dopana, endakali mendeme mona yukuo nalona latamo doko, baa tanda napala sambo lelyamo lao masalapape.
Yaina Nyingi Dokopi Kumingi Dokopi
Yaina nyingi dokopi, kumingi dokopi, dolapo sanguma mambele naepenge. Yaina epenge dokopi, kumingi dokopi, dolapo dopa petala epengena lao dokosapi, nesapi, sukulu latae dupame kandokondape pyoo kandengema. Paa longosa germ kenge virus lengepi, bacteria lengepi, dupame naimanya yongenya landa pyatala, naima yaina dyuapi, minao kumasoapi pingi. Yaina AIDS dokopi, TB dokopi, yaina dopale longo dupa dopa pyoo epenge. Germ virusapi, bacteriapi, dupa eteteaka yakane, dokosame glass kenge microscope lenge dupame minao kandengema. Kandatala dokopa, yaina doko dokome pyalame-lamo lao panengema.
Dee yaina mendapuame endakali pupae kumasingi mendapu silyamoaka. Monanya yaina (heart attack) dokome endakali yuu mendai kumasingi. Yaina doko dapa pyoo epenge: Nee grisa katapae longo nelyami dokome, taeyoko paenge kongapu doko moo lao lyokama-lyokama pingi. Dopa pilyamopa, endakali doko yaina pilyamo lao panala naelyamopa, mee katenge. Dopaka doko, taeyoko epenge kaitini doko lyokao etalu pilyamopa, endakali doko yuu mendai kumingi. Dopaka pyoo, endakali mendenya aiyombanya taeyoko paenge kongapu doko lyokatelyamopa, baa yuu mendai kumingiaka. Dee yaina dopale waka mendapu epengeaka.
Yaina dupa dokosame kandatala, nisepenge dupanya nisilyamopa, endakali dupa yapa saka pengema. Yangi dupa yainame ita minalyamopa kumingima. Yaina dupanya tenge dupa dokosapi, nesapi, dupame iki kandengema. Naima mee dupame yaina nyingi kaitinipi, kumingi kaitinipi, dupa kandenge manemane petala dupa sanguma-kisa soo pyasala naeyapenge. Glasman dupa dokosa daa dokonya, yainapi, kumingipi, dupanya tenge dupa nakandengema. Dee endakali kumapae mende lenge tasala naengemaka. Mee muni nyemana latala, sambo pii iki lengema.
Endakali kumingipi, yaina nyingipi, dupanya tenge dupa naima mee endakali dupame auu pyoo kanja naenge. Dopana, endakali mende kumatamopapi, yaina setamopapi, naimame sangumame pilyamona laa naeyapenge. Endakali mende kumatamopapi, yaina setamopapi, embame saka nyotoo latala, sae ita kepanya sangalinya setaowapi, dee mena pyanya sangalinya setaowapi, dee glasman dupa lanyoawapi, napyepape. Dopale dupame endakali yaina dupa saka nyala naenge. Dee kumapae dupa lenge tasala naengeaka. Dopana, endakali yaina pyapae dupa lanyoo yaina andaka dokonya dokosapi, nesapi, dupame yaina doko, doko-lamo lao kandena pupape. Dupame yaina doko kiningi doko-lamo lao nyakama langitami. Dokopa yaina dokonya matasini nalapape latami doko iki nalapape. Endakali yaina pyapae dupa dokosa yapa kanja napataminopa, yaina nyakamanya doko etete andake jetamopa, dokosapi, nesapi, dupame kapa nisala naeyatami. Dokosame nisala naeyalame-lamo latala, doko sanguma-kisa setala naeyalapape.
Kristene Dupa Kandao Dapa Lelyamano
Indupa Kristene dupa pii dake langilyamano. Sanguma-kisa setapala endakalimi endakali yango pyao kumasilyamino doko, kopeta pilyaminona lao, naima Kristene dupame lao panapenge. Dee naima Kristene dupame kandatala yapae napinya, doko sambona lapenge. Naimame sanguma doko kiningina latala, sangumana lao kisa setatami endakali dupa, naimame kopeta lelyaminona laa naeyatamano doko, naima sambo Kristene katatamanosa pita. Endakali mendapuame endakali mende kandao sangumana latala, kisa setatamino dokopa, siosa dokome endakali kisa setatamino doko nisepenge. Jisasame endakali mende sambo-kisa setala naeyao, paka pisala naeyao, pyao tanda maiya naeyao, pyao kumasala naeyaowaka pia-pyaa. Baame endakali kisa seteamipi, pyalanya piamipi, dupa kondo kaeyapala nisia-pyaa. Dopana, endakali mendeme endakali mende kandao baa-kisa sanguma palelyamona latamo doko, emba Kristene dokome baa sanguma daana lao pii epe mendeme nisepe. Dopa napitino doko, embame Jisasa Kraisa doko maita maitinosa pita. Embame yuu dakenya Jisasa maita maitino doko, baame Takange Gotenya enomba dokonya emba maitaka ditana, kandao katape.
Sanguma pii dokonya, Kristene mendapu nongo pyaowaka, paka kaeyaowaka pilyamino. Dopa petala, mee sambo dupanya kandenge manemane pilyamino. Dopa petala dupame lao pituu, "Gote doko kininingi kalyamona lengema. Dee Satane doko kiningi kalyamoakana lengemaka. Dopa lengema dokonya, sanguma pii doko kiningi mendeakana" lao masingima doko, kopeta masingima. Epesusa 6:12 dokonya dapa latae katenge: "Naimame endakali-pipa yanda pyaa naenya, spirit koo ketae kalyamino dupapi, spirit isingi dupapi, enomba nyoo isoo katenge spirit dupapi, isa yuu iminjetae dake isingi spirit dupapi, dupa-pipa yanda pilyamanona" lapae silyamo. Pii dake nyepala, endakali mendapuame endakali yango mendapu kandao sangumana latala, yangao kumasepengena lengema. Dopa lelyami dokome, pii dokonya tenge angi dupa soo nyala naeyalamini-lamo lao panenge. Dopa lengema dupame Gotenya kenge minao koeyaowaka, nyakamanya kenge minao koeyasoaka pilyamino. Pii dokonya tenge angi palelyamo doko dakena salapape: Kristene dupame Satanenya sambo waa katenge mana dupa kandao wandyuu kalyepape lao latae silyamo. Dopana, naimame endakali waka dupa pyao, tanda maiyoo, tilya nyoo, paka kaeyao, sambo dupa kiningi joo masoo, putiti kaeyao, pyepale lao, Sataname naima minakasetana, kandao kalyepale lao Epesusa 6:12 dokonya latae kalyamo. Dopana, naima kalyamano dapunya endakali mende kandao sangumana latala, tanda maiyoo koeyasetaminopa, lengeme mee kandatae kalya naenya, naimame sanguma pii doko sambona kaena lao kongo lao lamana.
Akali Samaria tange epe dokonya atome doko masalapape. Jisasame lao pituu, "Yuu mendepa akali mende Jerusalema katao, Jereko paanya lanao pea. Peamopa akali makongao, pake nao paenge koo mendapuame, kaitinisa minao makongotala, baa pyao indyuu kumapenge joo setapala, baanya yonge peepi, oapipi dupa nyoo peami. Dopa petala pateaminopa, pitisa mende ipupala, akali pyapae doko kandatala, baa lemba pyatala pea. Dee Gotenya anda nee nyetae dokonya akali kalai pingi, Lipai mende epeamo dokome, akali pyapae doko kandatala, baa lembaka pyatala pea. Pateambinopa dee akali Samaria tange mende epea dokome, akali pyapae siamo doko kandatala kondo kaeya. Kondo kaeyapala akali pyapae siamo dosa tengesa pupala, olipi ipangepi, waenepi, dupame pyapae dupanya kai pyapala, yaki pyakamaiya. Dopa petala, baame akali doko kopinya, baanya dongi maita dokonya setapala, mandyuu endakali opone palenge anda mendenya palena lao setapala, kandao katea. Oo yongama, baame anda isoo katenge akali doko, muni silipa lapoma maitala baa lamaiyoo, ‘Embame akali dake isoo katakape. Namba pilyoto dokopa, embanya muni wakao akali dake-kisa nepate dutupa, yanu pyakatona’ lea-pyaana” Jisasame lea. Akali Parasaipa, Lipai dokopame kaitinisa akali pyapae siamo doko kandatala, lemba pyatala peambinoli pyoo, naima Kristene dupame dopa napimana. Samaria tange waka dokome, akali pyapae doko nisiamoli pyoo, naimame endakali sanguma-kisa setaminopapi, pyao yangataminopapi, sanguma pii doko sambona kaena lao kongo lao lamana. Pii nasetaminopa, yanda singi wii lao nyepala, endakali doko pyoo nyepenge.
Sanguma doko sambona, paka nakaeyalapape. Satane dokome endakali dupa minakasilyamopa, endakali dupame sanguma doko kiningipi lao paka kaengema. Dopaka doko sanguma doko sambona, paka nakaeyalapape. Baibolo vesa datupame emba nisalapomona salapape:
1 Jone 4:4 dokome dapa lelyamo: "Wane paluma, nyakama Gotenya wane. Nyakama-kisa Spirit kalyamo dokome, yuunya spirit kalyamo doko ita miningi. Tenge dokonya nyakamame dupa pitaka ita minateamina" lapae silyamo. Dopana, Gote baa nyakama Kristene dupanya mona andaka kalyamona lao masetala kyeto nyalapape. Goteme Satanepi, waka spirit koopi, mende endapi, akalipi, wanepi, dupanya ingi andaka landa pyatala, mona yukuo nena lao pupu lapae doko namaiya.
1 Jone 4:18 dokome dapa lelyamo: "Auu kaeyapae singi dokonya paka kaeyapae mende nasingi. Auu kaeyapae dokome paka kaeyapae doko watao kamaka nepenge. Paka kaeyapae singi dokonya auu kaenge doko etao sepenge dokonya nasingi. Aipumape, yanu nyalamino lao masingi dokonya paka kaenge doko pyakalyingina" lapae silyamo. Dopana, Gotenya auu kaenge doko nyakama-kisa setamopa, nyakamame dopale mende paka nakaeyapenge.
Matyu 16:25 dokonya Jisasame dapa lelyamo: "Endakali mendeme baa katatoana lao masetala baa tange pyoo nyalanya pitamo, dokome baanya lete katenge doko yakinata. Endakali mendeme namba lao masetala, baanya lete katenge doko yakinatamo, dokome baanya lete katenge doko kandao nyetana" lapae silyamo. Dopana, endakali mendapuame endakali mende kandao sangumana lataminopa, embame sepala, emba latamini-lao masetala, doko sambona kopeta lelyaminona lao nisala naeyeteno doko, embanya lete etete katenge doko yakinatenosa pita. Dopaka doko, embame endakali sanguma kenge latamino doko, doko sambona kopeta pilyamino lao niseteno doko, embanya lete etete katenge doko kandao nyetenosa pita.
Matyu 10:28 dokonya, Jisasame dapa lelyamo: "Yonge doko pyao kumasetamino dupame, imambu doko pyao kumasala naeyatamina, paka nakaeyalapape. Ele panda koo dokonya yongepi, imambupi, lapota etasepenge akali doko, paka kaeyalapape" lapae silyamo. Kristene mendapuame pii doko sepala, dapa lao masingima: Ele panda koo dokonya yongepi, imambupi, lapota etasepenge akali doko baa Satanena lao masingima. Dopaka doko, doko kopeta masingima. Goteme iki yongepi imambupi dolapo etasina lenge. Dopana, mee yuunya endakalipi, Satanepi, dupa paka nakaeyapenge. Gote ketae kaitinya katenge doko iki paka kaeyapenge.
Kristene Dupame Dapa Lao Masingima
Kristene dupame dapa lao masingima: Endapi, akalipi, dolapo mendai dopaleaka joo Gote tange waingi tao wasiana lengema. Dopaka doko, naimanya yumbange aputingipa dolapo koeyambi dokome, dolaponya mandipaenya mandipae dupa pitaka tanda nao kumao dee koaka pyaanya pingima-lamo. Goteme baanya Ikiningi dokome naima pyoo nyala epena lea. Baa endakali jepala, kumatoo lao masia dokome, naima pyoo nyia. Kraisa baa poko itanya pyao yukutae katapala, malunya sakateamo dokome, koo akali dokonya kyeto doko nyoo nepatala, naima mokao nyia. Endakali kaimbu nyepala, nyakamanya lete katenge doko Kraisa maingima dokaita, Satanenya pupu lapae dokome anjala naelyamopa, nyakama Kristene enenge mendapu katengema. Sanguma kiningina lao masingi Kristene dupame, Jisasa Kraisa tungi pingi doko mee joo nepatala, kiningi Kristene joo nakatengema.
Embame Jisasa tungi pingi-tamo doko, embame Satanepi, sangumapi, dopale mende paka nakaeyapenge. Embame Jisasa tungi napingi-tamo doko, Gotenya wai pii epe doko soo mana nyepala, Jisasa tungi pyalapape. Wai pii epe doko dakena salapape:
Naima pitakame Gotenya pii doko nepatala koo piamano dokome, Satanenya isingi mate dokonya mee anjetae paleama. Anjetae paleamanopa, naimanya koo pingi mana dokome naima kakopai nyia. Dokopa naimame naima tange kapa pao pyoo nyepenge nanjia. Dopa piamopa, Jisasame naima kondo kaeyapala, baanya lete katenge dokome, naimanya panda nyoo kii tamao nyia. Jisasame naimanya panda nyoo kumiamoaka doko, baa Satanenya isingi mate dokonya mee anjetae napalea. Baame Satanepi, kumingipi, koo pingi dokonya pupu lapaepi, dupa ita minatala malunya sakatea. Sakatateamopa, Goteme baa lanyoo kaiti-kisa pea. Indupa Jisasa baa Gotenya kingi tolae-kaita pituu, Gotenya isingi mate doko isoo kalyamo. Endakali mendeme Jisasa tungi pyatala, baanya koo pingi dupa dee napituu lao mona kapilyetamopa, baanya koo dupa kunao nepatakamai, Satenenya isingi mate dokonya pyoo nyepala, Gotenya isingi mate dokonya lanyeta. Dokopa endakali dokome Jisasanya pii dupa yakinala naeyao wata-minatamo doko, Goteme endakali dupa mokosetamo gii dokopa, baa kaiti-kisa pupala, kataowaka katata. Dopaka doko, endakali mendeme Jisasa tungi pyala naeyao, Satanenya kalai akali joo katatamo doko, Goteme endakali dupa mokosetamo gii dokopa, baa ita konjala naenge, ele panda koo dokonya pata. Panda dokonya endakali dupa ee lao, imbu kaeyao, nenge giti-gato lao nao katatami. Jisasame emba wii lao, Gotenya isingi mate dokonya ipu lelyamona, emba ipatepe? Pande Satanenya isingi mate dokonya mee katatepe?
Papua New Guinea Loo Doko
Endakali kandao sangumana latala, pyao yangelyamino dokome, Enga potopinjapi, Papua New Guinea pitakanya kenge doko minao koeyasoo, isa pyandala-kao pyandelyamino. Endakali kandao sangumana latala, pyao yangelyamino doko, Papua New Guinea gapomanepi, Enga gapamenapi, Enga Potopinja yanda singi isingipi, dupa pitakameme kyeto joo daa lelyamino. Dee Gotenya loo dokonya endakali pyao kumasingi mana doko daa latae palelyamoaka.
Endakali Mendapu Sangumana Latala Yangao Kumasilyamino Doko Kaena Lao Lelyamano
Indupa mana eteteaka eteteaka koo mende Enga potopinja dakenya ipatelyamo. Endakali mendapu sangumana latala, mee tenge setapala yangao kumasilyamino mana dokonya lao lelyamano. Wamba naimanya yumbange dupame mana koo doko naminiami-pyaa. Dopaka doko, indupa Enga endakali mendapuame mana koo doko minilyamino. Tenge dokonya, naima Enga Kristene siosa katenge dutupa pitakanya mendai-mendai lao pitipala, Baibolo kandao Enga piimi kapilyingi akali dutupame pii dake lelyamano.
Endakali mende kumatamopapi, yaina setamopapi, endakali mendapuame dapa lengema: Endakali mendeme endakali dokonya mona doko yukuo nalame-lamona lengema. Dokopa, apimi mona doko yukuo nalape lao glasman mende tipa pingima. Tipa pilyaminopa, glasman dokome angi kiningi laa naeyao, nemongo manemane pingi dokomena, endakali dupa minakasoo, baame endakali mende-kisa mee tenge setenge. Dopa pilyamopa, endakali dupame glasman dokonya pii doko sepala, endapi akalipi mende kenge lelya doko lanyepala, mona doko yukuo nyepala anja setalepe lao, paa longosa paka pisoo tipa pingima. Tipa pilyaminopa, endakali tenge setalyami dokome baa nakanjona lelyamo dokopa, baa paka pisoo, angi mona yukuo nalo laa latala baa tanda maiyoo yangengema. Dokopa baa tanda dyoo kumasalamini-lamo lao kandatala, baame tanda nandina latala, mee nalona lenge. Nalona latelyamopa, dupame deaka pyapa pyoo, "Embame iki nalepe? Mende maiyoo nalepe?" lao deaka tipa pyoo, tanda maiyoo yangao kumasingima. Dee mana koo longo mendapu minao, endakali mee tenge setapala, minao koeyasoo kumasingimaka.
Endakali mee tenge setalyami dupa-kisa mana koo mende nasingi. Glasmanepi, endakali glasmanenya pii sepala wata-miningima dupame, Satanenya kalai doko pilyamino dupa-kisa tenge singi. Endakali mendapu kandao sangumana latala pyao kumasilyami dokome, Satanenya kalai doko etasilyamano lengema. Dopaka doko, Satanenya kalai doko etasala naengema. Satenenanya kalai doko eteteaka minao andasingima. Dopa pilyami dokome, Satane kenge andake nyepala, kalai doko eteteaka minao andasimupa, naima endakali dupa dokonya konda pilyamano.
Glasman dupame angi nakandao, masala naeyaowaka, mee muni nyemana latala, endakali dupa minakasoo sambo lengema. Glasman dupanya pii dupa nasepenge. Dee glasman kenge doko kaeyapala, muni nyalanya sambo lenge akali lamana.
Naimame nyakama kiningi langilyamanona salapape! Endakalimi endakali yangonya mona yukuo nanenge. Endakali dupame angi mende nakandao, endakali mende kandao mee sangumana lengema. Dopa lengema dokonya, endakali waka dupame endakali doko kandao, baa sanguma-lumu lao masingima. Mana doko eteteaka koo mende. Endakali mendeme endakali mende kandao sangumana latamo doko, baanya pii doko kiningina lao masala naeyalapape. Embame endakali mende kandao baa sangumana lateno doko, embame baa pyao kumasetenosa pita. Dee maitakao emba kandao endakali mendeme sangumana latakana, endakali mende kandao embame sangumana nalapeaka. Dee endakali mende embame sangumana lao tenge setatenopa, pyao kumasetamino doko, embame koo pyoo Papua New Guineanya loo, endakali pyoo kumasala naeyape latae singi doko yalate. Dee maitakao Goteme endakali dupa mokosetamo gii dokopa, tenge doko emba-kisa ipatana, kandao katape.
Yuu Napotesa dokonya, wanaku kole ee kana tepoma latae mende mandipaeme nyingi-pyaa. Endangimi wanaku doko lanyoo yaina andaka paa longosa pao ipao pingi-pyaa. Dopa pilyamopa, baanya sekele buku dokonya nesa dupame yaina mandipaeme nyingina lao paa longosa pyanya setakamaingima-pyaa.
Gii mendepa, wanaku mandipaeme nyingi doko mandipaeme nyiamopa baa kumapae joo sia-pyaa. Dokopa, endakali dosa kateami dupame sae ita mende pokao sangalinya seteami-pyaa. Dopa piaminopa, wanaku doko dopa petae mee siamosa, mena mende pyao sangalinya setakamaina leami-pyaa. Dopa leaminopa, wanaku mandipaeme nyingi dokonya endanginya takange dokonya mena yakane mende andaka katao pilyamona, doko pyamana andaka mua latala peami-pyaa. Mena doko pyao yaowatae peteaminopa, endakali mendeme lao pituu, "Glasman mende amasa pilyamo lelyaminona" lea-pyaa. Dopa leamopa, endakali peteamino dupame glasman doko lanyala pena leami-pyaa. Dokopa glasman doko ipupala, endakali peteamino dupa lamaiyoo, "Wanaku dake endakali lenge mendeme kanjome-lamona" lea-pyaa. Dopa lateamopa, endakali peteamino dupame lao pituu, "Endakali api katalape?" lao nyakama-lapo leami-pyaa. Dokopa, mendapuame enda mende kenge leami-pyaa. Dokopa, enda kenge leami dokome wanaku kole dokonya mona yukuo nalame-lamona" lao, glasman dokome lea-pyaa. Dopa leamo tenge dokome, enda kenge leamino doko baanya andaka palipiamopa, andatombe dokonya pyale tao lanyepala, "Wanaku kole dokonya mona doko andusa yukuo setakamaiyepe?" lao tipa piami-pyaa. Dee "Embame endakali mende tole apata katalambipi" lao tipa piamiaka-pyaa. Dokopa enda dokome enda mende kenge latala, dokome bata yuungi salimi lekena latala, mendai baa nena lalona lea-pyaa. Dopa leamosa, enda mende doko maiyoo tole nalambini-lumu latala, baa yangao kumasiami-pyaa. Dopa petala, yongama enda mende doko lanyepala kingi nyoo maitakaita yaki petala, yangao kumasalanya piaminopa, enda dokome Jisasa lao loma siamopa, kingi maitakaita yaki piaminoli petae doko baa tangeme ipao enombatena katea-pyaa. Dokopa enda dokome nengeme kende dupa nao pindapala, paka pyakao pea-pyaa. Indupa enda doko yangao koeyasetae kombe paleta pilyamo. Glasman dokome sambo leamopa, enda dolaponya mende doko pyao kumasiami, mende doko yangao koeyesetae kombe paleta pilyamo. Glasman dokome sambo leamopa, enda mende doko kumao, mende doko yangao koeyasoo piami dokonya, yanda singimi glasman doko anjingi andaka anjoo pyandeami. Enda dolapo yangeamino akali dupame sambo piinya mee yangeama-lamo lao kandatala, nyakama paka kaeyapala yalo pyoo paelyamino.
Wanaku kole mandipaeme nyingi-lumu doko mandipaeme nyingi gii doko epeamopa, mandipaeme nyia-pyaa. Indupa mandipaeme nyingi wanaku doko saka pilyamo. Dopana, endakali mende kumatamopapi, yaina setamopapi, glasman mende kanja napupape. Glasman dupame muni nyalanya sambo iki lengema. Dupame lelyami mendenya dii manja naenge.
Yuu Napotesa dokonya iki napiami. Yuu waka Enga dakenya enda longo mendapu sangumana latala yangao kumasilyamino. Dee akali mendapu sangumana latala, pyao kumasiamiaka.
Baibolo dokome lao pituu, Satane doko sambo pii dupanya takangena lapae silyamo. Papua New Guinea yuu dakenya sanguma pii longo mendapu lao taelyamino. Dopaka pyoo, Enga yuu dakenya Sataneme minongapumupa, endakali mende kandao sangumana lengema pii doko taelyamo.
Endakali mendeme emba kandao sangumana latala kisa setatamopa, embame doko sambo lelyamona lao masalapeno. Dopana, endakali mendeme endakali mende kandao sangumana lao kisa setatamo dokopa, embame doko kiningina lao masala naenya, sambo kisaka setao lelyamona lao kandatala, nisoo pii lape.
Endakali mendeme endakali mende kandao baa sangumana latala, mona yukuo nalame-lamo latamo dokopa, embame baa lamaiyoo, "Embame mona doko yukuo nyipumupa angi lengeme kanjepe? Pande nyepala napumupa angi kanjepe?" lao tipa pipi. Dokopa baame yanu pyao, "Nambame nakanjo, mendeme lamona" lengema. Dopa latamopa, mende doko apipi lao tipa pipi. Dokopa baame kenge latamo endakali doko pao tipaka pipi. Tipa pitinopa, baame nakanjo, mendeme lamoakana lenge. Endakali mendaipi mendeme angi lengeme kanjona laa naengema. Dopana, endakali kandao sangumana lengema pii doko, nyakamame kiningina lao masala naeyalapape.
Endakali mende ganame pyatamino doko, kombe palitamopa kandapenge. Endakali mende konja-wuame pokatamino doko, kombe palitamopa kandapengeaka. Endakali dupame kombe kandatala, ganame-lamo laowapi, konja-waume-lamo laowapi lengema. Dopaka pyoo, endakali mendeme endakali mendenya mona yukuo nyipyali doko, mona yukunyiti kombe doko panao palipyali. Dopana, endakali mende kandao sangumana latala, baame endakali mendenya mona doko yukuo nalame-lamo latamino endakali dokonya mona yukunyiti kombe doko palelyape lao kanjepape. Kombe mende napalitamo kandatala, sambo pii-lamo lao masepenge. Dee nemongo mendemepi, spirit mendemepi kapa pao endakali mendenya mona yukuo nyala naenge. Dee mona yukuo nyepala kapa pao palyakamaiya naengeaka.
Endakali mende kumilyamopapi, yaina silyamopapi, endakali mendapuame mee pii mendapu wasoo kiningi joo dapa lengema: "Nambame yaka mende yangatoo lao kopyoo pupupa, endakali mendeme lengeme kanjomo. Yaka doko napala palimanopa, nambanya wane doko mee kumalamo. Dokonya endakali yaka minao ipupupa kanjomo dokome, nambanya wane doko mona yukuo nalame-lamo latala, baa-kisa setelyona" lengema. Pii dopale dupa kiningipi lao kanjanya moko minamali doko angi mende kandao nanyemali. Endakalimi pii dopale dupa lataminopa sepala, kiningi-lumuna lao masala naeyapenge.
Endakali mendeme mona yukuo nalepe lao tipa pitaminopa, nalo latamo kandao doko, itame yangelyamino dokonya paka kaeyapala, mee nalo lenge doko, nyakamame kiningina lao masala naeyalapape. Nyakamanya mende sangumana latala, yangao tanda ditaminopa, embame tanda nanatoo latala, naloaka laapeno doko, embame masepe. Doko kiningi napala laapenope, pande tanda natone latala, sambo laapepe? Daa, tanda natone latala, sambo laapeno. Dopana, endakali mendeme mona yukuo nalona latamo doko, baa tanda napala sambo lelyamo lao masalapape.
Yaina Nyingi Dokopi Kumingi Dokopi
Yaina nyingi dokopi, kumingi dokopi, dolapo sanguma mambele naepenge. Yaina epenge dokopi, kumingi dokopi, dolapo dopa petala epengena lao dokosapi, nesapi, sukulu latae dupame kandokondape pyoo kandengema. Paa longosa germ kenge virus lengepi, bacteria lengepi, dupame naimanya yongenya landa pyatala, naima yaina dyuapi, minao kumasoapi pingi. Yaina AIDS dokopi, TB dokopi, yaina dopale longo dupa dopa pyoo epenge. Germ virusapi, bacteriapi, dupa eteteaka yakane, dokosame glass kenge microscope lenge dupame minao kandengema. Kandatala dokopa, yaina doko dokome pyalame-lamo lao panengema.
Dee yaina mendapuame endakali pupae kumasingi mendapu silyamoaka. Monanya yaina (heart attack) dokome endakali yuu mendai kumasingi. Yaina doko dapa pyoo epenge: Nee grisa katapae longo nelyami dokome, taeyoko paenge kongapu doko moo lao lyokama-lyokama pingi. Dopa pilyamopa, endakali doko yaina pilyamo lao panala naelyamopa, mee katenge. Dopaka doko, taeyoko epenge kaitini doko lyokao etalu pilyamopa, endakali doko yuu mendai kumingi. Dopaka pyoo, endakali mendenya aiyombanya taeyoko paenge kongapu doko lyokatelyamopa, baa yuu mendai kumingiaka. Dee yaina dopale waka mendapu epengeaka.
Yaina dupa dokosame kandatala, nisepenge dupanya nisilyamopa, endakali dupa yapa saka pengema. Yangi dupa yainame ita minalyamopa kumingima. Yaina dupanya tenge dupa dokosapi, nesapi, dupame iki kandengema. Naima mee dupame yaina nyingi kaitinipi, kumingi kaitinipi, dupa kandenge manemane petala dupa sanguma-kisa soo pyasala naeyapenge. Glasman dupa dokosa daa dokonya, yainapi, kumingipi, dupanya tenge dupa nakandengema. Dee endakali kumapae mende lenge tasala naengemaka. Mee muni nyemana latala, sambo pii iki lengema.
Endakali kumingipi, yaina nyingipi, dupanya tenge dupa naima mee endakali dupame auu pyoo kanja naenge. Dopana, endakali mende kumatamopapi, yaina setamopapi, naimame sangumame pilyamona laa naeyapenge. Endakali mende kumatamopapi, yaina setamopapi, embame saka nyotoo latala, sae ita kepanya sangalinya setaowapi, dee mena pyanya sangalinya setaowapi, dee glasman dupa lanyoawapi, napyepape. Dopale dupame endakali yaina dupa saka nyala naenge. Dee kumapae dupa lenge tasala naengeaka. Dopana, endakali yaina pyapae dupa lanyoo yaina andaka dokonya dokosapi, nesapi, dupame yaina doko, doko-lamo lao kandena pupape. Dupame yaina doko kiningi doko-lamo lao nyakama langitami. Dokopa yaina dokonya matasini nalapape latami doko iki nalapape. Endakali yaina pyapae dupa dokosa yapa kanja napataminopa, yaina nyakamanya doko etete andake jetamopa, dokosapi, nesapi, dupame kapa nisala naeyatami. Dokosame nisala naeyalame-lamo latala, doko sanguma-kisa setala naeyalapape.
Kristene Dupa Kandao Dapa Lelyamano
Indupa Kristene dupa pii dake langilyamano. Sanguma-kisa setapala endakalimi endakali yango pyao kumasilyamino doko, kopeta pilyaminona lao, naima Kristene dupame lao panapenge. Dee naima Kristene dupame kandatala yapae napinya, doko sambona lapenge. Naimame sanguma doko kiningina latala, sangumana lao kisa setatami endakali dupa, naimame kopeta lelyaminona laa naeyatamano doko, naima sambo Kristene katatamanosa pita. Endakali mendapuame endakali mende kandao sangumana latala, kisa setatamino dokopa, siosa dokome endakali kisa setatamino doko nisepenge. Jisasame endakali mende sambo-kisa setala naeyao, paka pisala naeyao, pyao tanda maiya naeyao, pyao kumasala naeyaowaka pia-pyaa. Baame endakali kisa seteamipi, pyalanya piamipi, dupa kondo kaeyapala nisia-pyaa. Dopana, endakali mendeme endakali mende kandao baa-kisa sanguma palelyamona latamo doko, emba Kristene dokome baa sanguma daana lao pii epe mendeme nisepe. Dopa napitino doko, embame Jisasa Kraisa doko maita maitinosa pita. Embame yuu dakenya Jisasa maita maitino doko, baame Takange Gotenya enomba dokonya emba maitaka ditana, kandao katape.
Sanguma pii dokonya, Kristene mendapu nongo pyaowaka, paka kaeyaowaka pilyamino. Dopa petala, mee sambo dupanya kandenge manemane pilyamino. Dopa petala dupame lao pituu, "Gote doko kininingi kalyamona lengema. Dee Satane doko kiningi kalyamoakana lengemaka. Dopa lengema dokonya, sanguma pii doko kiningi mendeakana" lao masingima doko, kopeta masingima. Epesusa 6:12 dokonya dapa latae katenge: "Naimame endakali-pipa yanda pyaa naenya, spirit koo ketae kalyamino dupapi, spirit isingi dupapi, enomba nyoo isoo katenge spirit dupapi, isa yuu iminjetae dake isingi spirit dupapi, dupa-pipa yanda pilyamanona" lapae silyamo. Pii dake nyepala, endakali mendapuame endakali yango mendapu kandao sangumana latala, yangao kumasepengena lengema. Dopa lelyami dokome, pii dokonya tenge angi dupa soo nyala naeyalamini-lamo lao panenge. Dopa lengema dupame Gotenya kenge minao koeyaowaka, nyakamanya kenge minao koeyasoaka pilyamino. Pii dokonya tenge angi palelyamo doko dakena salapape: Kristene dupame Satanenya sambo waa katenge mana dupa kandao wandyuu kalyepape lao latae silyamo. Dopana, naimame endakali waka dupa pyao, tanda maiyoo, tilya nyoo, paka kaeyao, sambo dupa kiningi joo masoo, putiti kaeyao, pyepale lao, Sataname naima minakasetana, kandao kalyepale lao Epesusa 6:12 dokonya latae kalyamo. Dopana, naima kalyamano dapunya endakali mende kandao sangumana latala, tanda maiyoo koeyasetaminopa, lengeme mee kandatae kalya naenya, naimame sanguma pii doko sambona kaena lao kongo lao lamana.
Akali Samaria tange epe dokonya atome doko masalapape. Jisasame lao pituu, "Yuu mendepa akali mende Jerusalema katao, Jereko paanya lanao pea. Peamopa akali makongao, pake nao paenge koo mendapuame, kaitinisa minao makongotala, baa pyao indyuu kumapenge joo setapala, baanya yonge peepi, oapipi dupa nyoo peami. Dopa petala pateaminopa, pitisa mende ipupala, akali pyapae doko kandatala, baa lemba pyatala pea. Dee Gotenya anda nee nyetae dokonya akali kalai pingi, Lipai mende epeamo dokome, akali pyapae doko kandatala, baa lembaka pyatala pea. Pateambinopa dee akali Samaria tange mende epea dokome, akali pyapae siamo doko kandatala kondo kaeya. Kondo kaeyapala akali pyapae siamo dosa tengesa pupala, olipi ipangepi, waenepi, dupame pyapae dupanya kai pyapala, yaki pyakamaiya. Dopa petala, baame akali doko kopinya, baanya dongi maita dokonya setapala, mandyuu endakali opone palenge anda mendenya palena lao setapala, kandao katea. Oo yongama, baame anda isoo katenge akali doko, muni silipa lapoma maitala baa lamaiyoo, ‘Embame akali dake isoo katakape. Namba pilyoto dokopa, embanya muni wakao akali dake-kisa nepate dutupa, yanu pyakatona’ lea-pyaana” Jisasame lea. Akali Parasaipa, Lipai dokopame kaitinisa akali pyapae siamo doko kandatala, lemba pyatala peambinoli pyoo, naima Kristene dupame dopa napimana. Samaria tange waka dokome, akali pyapae doko nisiamoli pyoo, naimame endakali sanguma-kisa setaminopapi, pyao yangataminopapi, sanguma pii doko sambona kaena lao kongo lao lamana. Pii nasetaminopa, yanda singi wii lao nyepala, endakali doko pyoo nyepenge.
Sanguma doko sambona, paka nakaeyalapape. Satane dokome endakali dupa minakasilyamopa, endakali dupame sanguma doko kiningipi lao paka kaengema. Dopaka doko sanguma doko sambona, paka nakaeyalapape. Baibolo vesa datupame emba nisalapomona salapape:
1 Jone 4:4 dokome dapa lelyamo: "Wane paluma, nyakama Gotenya wane. Nyakama-kisa Spirit kalyamo dokome, yuunya spirit kalyamo doko ita miningi. Tenge dokonya nyakamame dupa pitaka ita minateamina" lapae silyamo. Dopana, Gote baa nyakama Kristene dupanya mona andaka kalyamona lao masetala kyeto nyalapape. Goteme Satanepi, waka spirit koopi, mende endapi, akalipi, wanepi, dupanya ingi andaka landa pyatala, mona yukuo nena lao pupu lapae doko namaiya.
1 Jone 4:18 dokome dapa lelyamo: "Auu kaeyapae singi dokonya paka kaeyapae mende nasingi. Auu kaeyapae dokome paka kaeyapae doko watao kamaka nepenge. Paka kaeyapae singi dokonya auu kaenge doko etao sepenge dokonya nasingi. Aipumape, yanu nyalamino lao masingi dokonya paka kaenge doko pyakalyingina" lapae silyamo. Dopana, Gotenya auu kaenge doko nyakama-kisa setamopa, nyakamame dopale mende paka nakaeyapenge.
Matyu 16:25 dokonya Jisasame dapa lelyamo: "Endakali mendeme baa katatoana lao masetala baa tange pyoo nyalanya pitamo, dokome baanya lete katenge doko yakinata. Endakali mendeme namba lao masetala, baanya lete katenge doko yakinatamo, dokome baanya lete katenge doko kandao nyetana" lapae silyamo. Dopana, endakali mendapuame endakali mende kandao sangumana lataminopa, embame sepala, emba latamini-lao masetala, doko sambona kopeta lelyaminona lao nisala naeyeteno doko, embanya lete etete katenge doko yakinatenosa pita. Dopaka doko, embame endakali sanguma kenge latamino doko, doko sambona kopeta pilyamino lao niseteno doko, embanya lete etete katenge doko kandao nyetenosa pita.
Matyu 10:28 dokonya, Jisasame dapa lelyamo: "Yonge doko pyao kumasetamino dupame, imambu doko pyao kumasala naeyatamina, paka nakaeyalapape. Ele panda koo dokonya yongepi, imambupi, lapota etasepenge akali doko, paka kaeyalapape" lapae silyamo. Kristene mendapuame pii doko sepala, dapa lao masingima: Ele panda koo dokonya yongepi, imambupi, lapota etasepenge akali doko baa Satanena lao masingima. Dopaka doko, doko kopeta masingima. Goteme iki yongepi imambupi dolapo etasina lenge. Dopana, mee yuunya endakalipi, Satanepi, dupa paka nakaeyapenge. Gote ketae kaitinya katenge doko iki paka kaeyapenge.
Kristene Dupame Dapa Lao Masingima
Kristene dupame dapa lao masingima: Endapi, akalipi, dolapo mendai dopaleaka joo Gote tange waingi tao wasiana lengema. Dopaka doko, naimanya yumbange aputingipa dolapo koeyambi dokome, dolaponya mandipaenya mandipae dupa pitaka tanda nao kumao dee koaka pyaanya pingima-lamo. Goteme baanya Ikiningi dokome naima pyoo nyala epena lea. Baa endakali jepala, kumatoo lao masia dokome, naima pyoo nyia. Kraisa baa poko itanya pyao yukutae katapala, malunya sakateamo dokome, koo akali dokonya kyeto doko nyoo nepatala, naima mokao nyia. Endakali kaimbu nyepala, nyakamanya lete katenge doko Kraisa maingima dokaita, Satanenya pupu lapae dokome anjala naelyamopa, nyakama Kristene enenge mendapu katengema. Sanguma kiningina lao masingi Kristene dupame, Jisasa Kraisa tungi pingi doko mee joo nepatala, kiningi Kristene joo nakatengema.
Embame Jisasa tungi pingi-tamo doko, embame Satanepi, sangumapi, dopale mende paka nakaeyapenge. Embame Jisasa tungi napingi-tamo doko, Gotenya wai pii epe doko soo mana nyepala, Jisasa tungi pyalapape. Wai pii epe doko dakena salapape:
Naima pitakame Gotenya pii doko nepatala koo piamano dokome, Satanenya isingi mate dokonya mee anjetae paleama. Anjetae paleamanopa, naimanya koo pingi mana dokome naima kakopai nyia. Dokopa naimame naima tange kapa pao pyoo nyepenge nanjia. Dopa piamopa, Jisasame naima kondo kaeyapala, baanya lete katenge dokome, naimanya panda nyoo kii tamao nyia. Jisasame naimanya panda nyoo kumiamoaka doko, baa Satanenya isingi mate dokonya mee anjetae napalea. Baame Satanepi, kumingipi, koo pingi dokonya pupu lapaepi, dupa ita minatala malunya sakatea. Sakatateamopa, Goteme baa lanyoo kaiti-kisa pea. Indupa Jisasa baa Gotenya kingi tolae-kaita pituu, Gotenya isingi mate doko isoo kalyamo. Endakali mendeme Jisasa tungi pyatala, baanya koo pingi dupa dee napituu lao mona kapilyetamopa, baanya koo dupa kunao nepatakamai, Satenenya isingi mate dokonya pyoo nyepala, Gotenya isingi mate dokonya lanyeta. Dokopa endakali dokome Jisasanya pii dupa yakinala naeyao wata-minatamo doko, Goteme endakali dupa mokosetamo gii dokopa, baa kaiti-kisa pupala, kataowaka katata. Dopaka doko, endakali mendeme Jisasa tungi pyala naeyao, Satanenya kalai akali joo katatamo doko, Goteme endakali dupa mokosetamo gii dokopa, baa ita konjala naenge, ele panda koo dokonya pata. Panda dokonya endakali dupa ee lao, imbu kaeyao, nenge giti-gato lao nao katatami. Jisasame emba wii lao, Gotenya isingi mate dokonya ipu lelyamona, emba ipatepe? Pande Satanenya isingi mate dokonya mee katatepe?
Papua New Guinea Loo Doko
Endakali kandao sangumana latala, pyao yangelyamino dokome, Enga potopinjapi, Papua New Guinea pitakanya kenge doko minao koeyasoo, isa pyandala-kao pyandelyamino. Endakali kandao sangumana latala, pyao yangelyamino doko, Papua New Guinea gapomanepi, Enga gapamenapi, Enga Potopinja yanda singi isingipi, dupa pitakameme kyeto joo daa lelyamino. Dee Gotenya loo dokonya endakali pyao kumasingi mana doko daa latae palelyamoaka.
